Hun Tawp Dawna Pathian Mite, Pathian Kohhran Awmchhun Chu!

   Hun hnuhnungbera Pathian mite, Pathian Kohhran chu Krista Pahnihte, chuchu hretu Pahnihte, Zawlnei Pahnihte tiin Thupuan 11 chuan a sawi ani.
   Achhan chu Pathian in Krista Pahnihte rin chu A duhzawng ani si a. Krista pahnihte ringtute chauh chu hun hnuhnungbera Pathian mite, A kohhran awmchhun anni tih he Bible bung aṭang kan hre thei ta ani.
   Anni chu Pathian Thupek (Sawm) Zawma Isua Krista Ringtute an ni tih Thupuan 12: 17, 14: 12ahte kan hmu thei bawka, Mithianghlimte tih anni tih pawh. (Heta hrilhfiah anga hrilh chu Krista pahnihna Hna pakhat ani.)
   An tuar turte pawh kan hmu.

   Thupuan 12: 4naah Olive thingkung pahnih, khawnvar dahna pahnih tih Zakaria 4a inziak Krista Pahnihte anni kan tih tawh nen thuhmun ani.

   Lal Isua vana lak chhoh anih hnuah thleng ang khan Krista pahnihna hun zawhah Thlarau Thianghlim ruah hnuhnungber a lo thleng ang tih post hmasa lamah kan sawi tawh kha, Thupuan 11 ah hian engtinnge A thawh dawn tih A rawn sawilawk ani.
   Ani, chang 11: 5, 6 chuan Kohhran hnuhnungber Hretu Pahnihte (Krista Pahnihte ringtute) tia koh chuan thiltihtheihna nasa tak nen kum thum leh a chanve chhung Thlarau Thianghlim dawngin Pathian thu an hril ang A ti. Pathian in A zawlnei Joel'a (2: 28, 29) hmangin "Ka thlarau tisa zawng zawng chungah Ka leih chhuak anga  In fapate leh fanute'n an hrillawk ang, in tar ten mangte an mang ang, in ṭhalai ten inlarnate an hmu ang: Chuan, chumi niteah chuan chhiahhlawhte chungah leh awmpuinute chungah Ka thlarau ka leih chhuak ang," tih A sawilawk ang khan.

   Chang 8naah chuan Jerusalem chu "thlarau in Sodom leh Aigupta tia koh ani," tiin Pathian in A zawlnei John'a hmangin A hrilhlawk bawk ani. "Chutah bawk chuan an Lalpa (Lal Isua, Krista Pakhatna leh Ropui zawk) chu Khenbehin A awm kha," tih chuan Jerusalem anih zia A ti chiang ani.
   Hmun sawma hmunkhat a chhiat tur thu pawh a hnuailam changah hrilhlawk ani bawk. Chu chhiatnaah chuan mi engzah nge an thih dawn tih pawh. Pathian in A zawlnei Daniel'a leh John'a hmanga A hrilhlawk Sakawlh (AntiChrist/Krista Dotu) lo chhuah hun pawh kan hmu thei.

   Krista Pahnihte ringtute chu Jerusalema Pathian thu an hril zawha Sakawlh anmahni dotu lo chhuaka an chunga atih ang tho in khawvel ramdangtea Krista Pahnihte ringtute chungah pawh tih ani ang.

   Thupuan 11 hi Angel parukna tawtawrawt Ham hnu, chuchu Chunpikna pahnihna hun chhung ani.(Thupuan 9: 13 - 11: 14) Chang 14 chuan ati fiah.

   KJV nilo Mizo Bible lehlin pangai a hnuaia hi dah ani. Han chhiar mah, I hrethiam ve nual mai ang, post hmasate I lo chhiar chuan.

   "Thupuan 11: 3.  Tin, ka thu hretu pahnihte hnenah chuan thu ka pe ang a, tichuan saiip puan sinin ni 1,260 chhung zawng thu an hril ang," a ti a.
4.  Chung chu oliv thingkung pahnih leh khawnvar dahna pahnih khawvel Lal hmaa dingte chu an ni.
5.  Tin, anni chu tupawhin tihnat an tum chuan anka atangin mei a lo chhuak a, an hmelmate chu a kangral thin. Tin, tupawhin anni chu tihnat tum ang se la, chutiang bawka tihhlumin an awm tur a ni.
6.  Chungte chuan an thu hrilh chhung zawng ruah sur lo tura van tihpin theihna an nei; an duh hun apianga thisena chantir turin tuite chungah thu a nei a, khawvel hi hremna tinrenga hrem turin thu an nei bawk a.
7.  Tin, an hriattirna thu chu an hrilh zawh huna leilawt atanga sakawlh lo chhuak chho tur chuan anmahni a do ang a, a hneh ang a, a tihlum ang.
8.  Tin, an ruang chu khaw ropui kawtthlerah chuan a awm reng ang a; chu khaw ropui chu thlarau in Sodom leh Aigupta tia koh ani, chutah bawk chuan an Lalpa chu khenbehin a awm kha.
9.  Tin, mite zinga mi te, chite zinga mi te, tawngte zinga mi te, hnamte zinga miten ni thum leh a chanve an ruangte chu an en ang a, an ruangte chu thlana phum an phal lo ang.
10.  Tin, an thih avangin leia awmte chu an lawm ang a, hlimna an siam ang a, lawmnate an inthawn bawk ang; zawlnei pahnihte chuan leia awmte chu an tihhrehawm thin avangin.
11.  Tin, ni thum leh a chanve hnuah chuan Pathian hnen ata nunna thaw chu an chhungah a lo lut a, an kein an ding ta a; tichuan a hmutute chuan an hlau ta em em a.
12.  Tin, an hnenah, "Hetah hian lo chho rawh u," tia van atanga aw ring tak an hria a. Tichuan, chhum zingah chuan vanah an chho ta a; an hmelmate chuan an hmu reng a.
13.  Tin, chu mi lai tak chuan lir nasa takin a lo nghing a, khua chu hmun sawma thena hmun khat a chim ta a, lirnghingah chuan mi 7,000 an thi a; tin, a bakte chuan an hlau a, van Pathian chu an chawimawi ta a.
14.  Chungpikna pahnihna chu a reh tawh a, ngai teh, Chungpikna pathumna chu a lo awm lawk dawn e."

   facebook groupa en duh tan:
   Krista Pahnihna Bible leh A. D. Zawlneite Hrilhlawk Hriatchianna