Van Lalram Lut Turte leh Meidila Tla Turte Chu Tute Nge?

   Van ram lut turte leh mei dil tla turte chu chiang takin Bibleah ziakin a awm a, chuchu ngaihdan dah boa thinlung hawngin ṭawngṭaina nen kan zir chuan kan hmu fiah em em dawn ani.
   Bibleah chutiang chiang taka ziakin a awmloh chuan chhiarin awm zia a neilo anga, thlamuanna leh ram ṭha zawk, vanram beisei in awmzia a neilo ang, a kawng kan hriat miau si loh chuan. Chuvang chuan hmu fiah ang u.

   *VANRAM LUT TURTE*

   Lal Isua chuan, "Van lalram chu hetiang naupang angte ta ani. Chiang takin in hnenah Ka sawi e, in inthlaka naupangte ang in lo nih hmaloh chuan van lalram in lut miah lovang. Chiang takin in hnenah Ka sawi e, tupawh naupang anga Pathian lalram lo dawnglo chuan engti kawng mahin chutah a lut lovang," tiin a sawi chiang hle ani. (Mat 19: 14, 18: 3, Luk'a 18: 17 KJV)
   *A awmzia chu, 'naupang thinlung ang kan nei tur ani,' A ti ani. Chutiang thinlung neite chu ani piangthar awmzia, piangtharte chu, tih nuam tak, zirtir theih, thuawih thei tak an ni si a. Chuchu Lalpa Pathian duh zawng tak ani. Inngaihtlawm tur tih chuan inngaitlawm mai te, Thupek Sawm zawm tur tih chuan zawm mai tute anni.*

   Thupek Sawm zawmlo leh Lal Isua ringlote chu van lalram an lut dawnlo em ni kan tih chuan, a chunga kan sawi anga naupang thinlung neite an niha Pathian thu an hun leh hmuna thleng apiang hnawltu niloa lo pawma nunpui tute an nih phawt chuan van lalrama lak luh an ni dawn ani. Mahse, Thupek Sawm zawma Lal Isua rin tur tih thu hriaa thih thlenga zawmlote an lut lovang.
   *Hun DangDanga Pathian Thu Thar Thlengte," tih posta Pathian mite chu an hnung leh hun a Pathian an rin avanga A thu thleng tharte an pawma an zawm zel zia aṭang naupang thinlung ang an neih zia leh van lalram lut tlak an nih zia kan hmuh ang khan.*

  Khawvel hun tawpa lei mite zinga van lalram lut turte erawh chu naupang thinlung ang neia Thupek Sawm zawma Isua Krista ringtute chauh anni tih Thupuan 12: 17, 14: 12 aṭang kan hre thei.
   Chumi thu Biblea ziak puangnawn leh tichiang tur ni pah fawmin tuna hun tawp, Thupuan 6 hun, inṭan meka Pathian thu lo thleng thar (Pathian mite tana hmân aṭanga Biblea awm tawh) tisaa chang Krista Pahnihna aṭang khawvel zawng zawngin a hre dawn ani.

   *MEIDILA PAIH TURTE*

   Meidila tla, paih turte chu a chung aṭang kan hre thei ṭheuh tawh awm e, chung mite chu, a tawi zawngin, naupang thinlung ang neilote an ni.
   *Achhan chu, zirtir theihloh, ngaihdan leh khawvel doctrine mihring thupektea siam hmangaihtu, thuawih duhlo luhlul takte an ni si. Pathian thu thleng tharte chu Juda ho in an hnawl anga hnawl tute an ni. Piangthar inti mahse an inbuma mi pawh bum tum mai an ni zawk. (Isaia 29: 13, Matthew 15: 9, Mark 7: 7)*

   Fiah zawk tur chuan Pathian thu, Bible a ziak a hnuai ami ang hi ani.
   Thupuan leh a dangah te chuan meidila mei leh kâta hal turte chu, "dawihzep, ringlo, inremlo, mi hua, ngaihdan hmangaihtu, tenawm, sawiseltu, duham, zurui, mi thil hneh chihtu rukru, mi ngaihmelh, inneilo va sex hmang, ran nena sex hmang, pa leh pa nu leh nu sex hmang, uire, dawithiam, milem bia, tualbthat, dawheh te an ni.
   (Thupuan 21: 8, 1Korin 6: 9, 10, Ephesi 5: 5, Kolossa 3: 5, Galatia 5: 19 - 21, 1Johan'a 3: 5, Matthai'a 5: 28, Leviticus 18: 23, 20: 13, Rom 1: 26, 27, 1Timothy 1: 9, 10)
   *A khaikhawmna chu Thupek Sawm zawmlo te an nih chu. Lal Isua'n, "Thupek Sawmah dan leh Zawlneite (Krista Pahnihte tiamin) thu zawng zawng a inkhai ani," A ti si a.*
    "Zawlnei pakhat pawh ama ram ngeiah pawm anilo," Lal Isua'n a tih ang khan Krista (Pahnihte) chu Zawlnei a chhiar tel a nih zia kan hrethiam thei awm e. (Luk'a 4: 24)

   *Thupek Sawm chu Thupek chi hnih ani a, 1 - 4na chu Pathian thinlung, thlarau leh ngaihtuahna zawng zawnga hmangaih dan tur ani a, 5 -10na chu mahni inhmangaih anga vengte hmangaih dan tur ani. Lal Isua'n chuchu A hriatchian em em avangin Thupek Sawm chu Pahnih - Thupek hmasaber leh a pahnihna (Matthai'a 22: 36 - 40ah) A ti ani.*

   Pathian thu thleng tharte zawm duhlo, mahni ngaih leh hmuh dan chauh hmangaih mihringte, Zawlneiderte, Thiltihtheihna neite, mi chunga thilṭha titute, Lal Isua ring inti member, puithiam, evangelist, pastor, reverend, father, bishop tamtakte pawh meidilah paih luh an ni dawn ani.
   *Lal Isua'n, "Lalpa mi ti na zawng van ram an lut lovang, Ka Pa van Ami duh zawng titute chauh an lut ang," A tih ang khan. (Matthai'a 7: 21)*
   *Achhan chu, Pa Pathian duh zawng chu a hun ang zela A thu a thlen tir tharte ani. Hun tawp atan chuan Thupek Sawm zawma Isua Krista (Krista pahnihna tiamin) rin chu A duh zawng ani.*

   Chuvang chuan ani, rawngbawltu tamtak Lal Isua hming emaw thildang emaw hmanga tihdam theihna neite, khawih thluk theihna neite, thilmak ti thei tamtak meidila paih an ni dawn ani.
   "Chu mi niah chuan mi tam takin, 'Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam takte kan ti thin lo em ni,' an la ti ang.
   *Chu mi hunah chuan, 'Nangni thil sual tite u, ka hre ngai lo va che u, ka hnen ata kal bo rawh u,' tiin anni chu ka la hrilh ang." Lal Isua in A hrilhlawk ang khan. Matthai'a 7: 22, 23*
   Achhan chu, Pathian duhzawng, A thu A pek thar, khawvela thleng tharte an pawm duhloh avang ani. Krista pahnihna ring duhlo te leh Thupek Sawm zawm duhlote pawh an thih hmaa an inlamletloha an sima naupang anga an inthlakloh chuan meidilah hrem anni dawn anih chu.

   *ENG HMANGA ROREL TUR NGE?*

   Meidila paih turte chu Thupek Sawm (Dan leh Zawlneite thu zawng zawng inkhaina anih avangin) in an chung thu rel ani ang. Thupek Sawm leh Lal Isua, Krista Pakhatna leh Krista Pahnihna thu hreloa tisual chu Thupek Sawm hmanga rel tur tho anni. An hnena Pathian thu thleng an pawmloh avangin thiamloh chantir, meidila paih tur anni si. Mahse, Thupek Sawm leh Krista Pahnihte hrelo hremna chu a nep deuh ang, "Hreloa tisual chu vawi tlemte vuak a ni ang," Lal Isua'n A tih ang khan. An hnena Pathian thu thleng chin zawmlohnaah erawh hremna a nep chuang lovang.
   Pathian thu chu Israel nilo Jentailte hnenah pawh A thlen ṭhin ani. Entirnan, Israel nilo Balaam'a hnenah pawh A thleng. Jentail Khawpui pakhat Nenevi ah pawh a thleng.

   Thupek Sawm zawma Krista Pahnih ringte leh chutiang thu hrelo mahse chatuan nunna pek turte erawh chu naupang thinlung ang neia Pathian ringa A thu an hnena thleng chinchin an zawm avanga khawngaihnaa pek an ni ang. An sualnate avangin hrem atan an chung thu rel ani lovang. Chuchu ani rinna avanga khawngaiha chhandamna famkim chu. "An sual nate Ka ngaidam anga Ka hre renglo vang," tiin Lalpa'n A zawlnei hmangain A hrilhlawk ang khan. (Jeremia'a 31: 34, 50: 20, Hebrai 8: 12)

   *ENGTIA REI NGE MEIDILAH AN KAN ANG?*

  "Mitin an rinna nilo an THILTIH ang zela pek tur an ni." (Job'a 34: 11, Jeremia 17: 10, Mat 16: 27, Thupuan 2: 23, 22: 12)

   *Pathian duh zawng, A thu mahni huna thleng ṭheuh hre reng si mahse pawma zawm duhlote vanram luh chu sawiloh an hremna tur chu a tam zual zawk dawn ani. Lal Isua'n, "Pathian duh zawng hriaa tisual chu vawi tamtak vuak ani ang," A tih ang khan. (Luk'a 12: 47)*

   Chuvang chuan, Thupek Sawm chu dan leh zawlneite (Krista Pahnihte tiamin) thu zawng zawng inkhaina anih angin, Chu mi rinloh (bawhchhiat) nasat ang zelin meidilah hrem an ni ang.
   *Thenkhat chu nikhat, thlakhat, kum khat, kum sawm te kang tlak anih chuan an kang dawn ani.*
   *Setan'a, Sakawlh leh Zawlneidiklo chu chatuana hrem an ni dawn tih hrilhlawk ani. (Thupuan 20: 10)*

  
   facebook groupa en duh tan:
   Krista Pahnihna Bible leh A. D. Zawlneite Hrilhlawk Hriatchianna