Thlarau Hnathawh leh Dawn Dan, Nula Thianghlim Sawm Thu Hrilfiahna, Hriak chu Thlarau Thianghlim A Nilo (Zakaria 4 zawmna)
Olive Kung (Hriakthih) Pahnih, Rangkachak Hriak leh Khawnvar chu Enge? (Zakaria 4) Zawmna ani, a hnuai ami hi --
c) THLARAU THIANGHLIM DAWNG DUH TANA TIH TUR?
Olive kung pahnihte rangkachak hriak chu khawnvar pasarihah a lut khawm veve tih Zakaria 4ah kan hmu a.
A awmzia chu Pathian Thu Krista Pahnihte aṭanga chhuak chu hmunkhatah - khawnvar pasarihah a lut khawm veve tihna ani.
Chuvang chuan Sam bua ziak angin, tupawhin Pathian thu chu a ke atan khawnvar leh a kawng atan êng ni turin a duh chuan Pathian Thu Krista (Olive Kung) Pahnihte sawi chu a duha a pawm veve angai ani. Chutiang tilo chu thimah a awm reng anga, meidilah na tak leh rei tak kangin a thi boral kumkhua dawn ani, Lal Isua in A sawi nula thianghlim â panga, bûra hriak tamtak kengtel ve lote ang kha anni si a.
Nula thianghlim â pangate tuar ang tuar duhlo chuan Krista Pahnihte aṭanga chhuak Pathian thute chu rilruah khawlkhawma nuna ken tel, nunpui zel tur ani. Nula thianghlim fing panga ten hriak hmanbelh ngaih thuta hman tur an kenna bur chuan a entir chu thluak, hriatrengna hi ani tih pawh kan hre ta. Chumi tur chuan Pathian Thu an zir, an chhiar an zawng nasa hle tih pawh kan hre thei nghal ta bawk ani.
Mopa (Krista Pakhatna lokallehna) hmuaka he khawvel thima I khawnvarin êng a pek chhuah reng theih nan che leh he khawvel zanlai taka Amah lokal chu hlim taka tawk tura I va pana, inneihna ruai kil turin A inchhung nuamah A hruailuh theih nan che u Krista (Olive Kung) Pakhatna chauh nilo Pahnihna pawn Pathian Thu thar leh hrilfiahnate A pek chhuah chu I pawma I nunpui angai ani.
Ringtu hmasaberte hunlaia mite chuan Lal Isua thu hriaa pawmlo leh Amah ringloten Pathian Thlarau, Thlarau Thianghlim an dawnglo tih kan hria.
Chutiang bawkin Krista pahnihna kalbo hnua A tawpber atana Thlarau Thianghlim lo thleng tur chu Krista Pahnihna aṭanga chhuak Pathian Thu pawma nunpui lovin a chan theih dawnlo ani. Chuvang chuan, hunhnuhnungbera Thlarau Thianghlim dawng duh chuan Krista Pahnihna pek chhuah Pathian Thu pawma, thinlunga daha nunpui tur ani. A awmzia chu Krista Pahnihte rangkachak hriak (Pathian thu chu I pawma I kawla I nunpui chuan Pathian Thlarau Thianghlim I dawngin A awmpui dawn che a, tichuan, awmze nei takin, "Lalpa chu min vengtu ani a, ka tlachham lovang," I ti thei dawn ani, hun khirh takah pawh, mahse Pathian chu I rin tlat angai ve dawn ani.
"Hmanlai chu amahin alo thleng nawn," (History repeat itself) tih ang khan alo thleng nawn dawn ani.
Entirnan, Pathian zawlnei Pu Noa'a kha a nupui leh faten ringloin a thu awihlo se an dam chhuak angem, a ringlotu, a thu awihlotute kha an damchhuak em? Pathian zawlnei Mosi'a kha Israelten ringloin a thu awihlo se Aigupta aṭang an chhuak angem? Ani, Pathian zawlneite ringlotute chu khawngaihnain vanramah lakluh an ni ve angem?
A teuhlo mai.
Chutiang chu ani, Krista pahnihna pawh lo ringlotute chuan Tawp dawna Thlarau Thianghlim lo thleng tur an dawng ve lovanga na tak leh rei tak tuarin an boral tlang zawk ang.
d) PATHIAN THU LEH THLARAU THIANGHLIM LAK HRAN THEIH ANI EM?
Pathian in A Thu A Thlarau hmangin A zawlneite A pe a, chuan A zawlneite hmang lehin mihringte min pe lehchhawng a, A Thlarau Thianghlim hmu ve tur chuan A Thu chu kan lo awih hmasak a ngai ani.
Entirnan, Pu Enok'a khan Pathian thu Pu Adam'a aṭanga inpek chhawn zel kha lo ringlo se Pathianin A zawlnei atan A hmang lovang. Pu Noa pawh chuti tho tur. Chutiangin, Pu Abraham'a, Isak'a, Jakob'a leh Josef'a te pawh. Pathian Thu an hmaa mite hnena peka awm dik taka lo rin leh zawm zel hi Pathian duhsakna, Thlarau Thianghlim dawnna ani.
Zawlnei Mosi'a pawh a hmaa mite Pathian Thu a pawma, Zawlnei Samuel'ate, Lal David'ate, Lal Solomon'ate leh a dangdangte pawh chuti tho, chuan an hunlaia Pathian zawlneite pawh an ringa an thu an awiha tichuan Pathianin A Thlarau pe in A hmang ṭhin ani. Pathian Thu leh A Thlarau (Thlarau Thianghlim) ṭhen hran theih anilo anih chu. A theihlohna chu Thlarau Thianghlim chuan Pathian Thu an awih ve tlat si a, chuan an hriat bak chu Thlarau Thianghlim chuan trul A tih chuan A hriattir thrin ani, mahse Pathian Thu awmsa te chu an nunpui a ngai ani, chutilo chu Saul'a angin Pathian in A laksak dawn si a.
An hmaa Pathian Thu thleng tawhte awih lovin Pathian in A chhiahhlawh atan A hmang hlawm angem? Lal David'a pawh kha Pathian Thu awmsa awih hmasa lovin Lal nih nan Zawlnei Samuel'a kut kaltlangin Hriakthih a dawngin Lal ani angem? Chuan, Thlarau Thianghlim awmpuina leh, chu Thlarau Thianghlim aṭang Pathian Thu dawn belhin a sawi in a hrilhlawk thei ngem?
Ni thei anilo.
Chuvangin, Pathian Thu leh Thlarau Thianghlim ṭhen hran theih anilo ani. Pathian in A Thu A Thlarau hmanga alo pek hmasakte pawm lovin A Thlarau dawn theih anihlo avangin Pathian Thu diklo taka zirtirna pawmtute hnenah chuan Thlarau Thianghlim nilo Thianghlimlo zawk Setan'a Thlarau a thleng ṭhin ani. Chuvang chuan zirtirna diklo, Pathian thu leh ngaihdan inpawlh zirtirna hi Lal Isua'n mihring doctrinete A tih kha ani a, a hlauhawm hle ani, Thlarau Sual leh Bum hmang dawnna ani si.
Entitnan, Lal Saul'a khan Pathian Thu duhloa pawmloa zawmlo in A ngaihdan a duh zawka a zui ta zawka, tichuan Thlarau Thianghlim, Pathianin A Thlarau A pek chu A laksaka Satan'a Thlarau, Thlarau Sualin a rawn awmpuii a control ta zawk ṭhin ani. (1 Samuel'a 16: 14)
Pathian Thu kalh tlata kalte chu Pathianin Thlarauin kawngdik a kawh hmuhte chu an tamlo. Entirna pakhat chu Pu Paul'a kha ani. Chuvang chuan aw unau he Pathian Thu I hmuh hi pawm rawh. I rindan ngaihdan leh khawvel kohhran zirtirna, mihring doctrineteah innghat suh la Krista Pahnihna Bible'a ziak thu hi hmu zawk rawh.
e) THLARAU THIANGHLIM CHU HRIAK IN A ENTIR LO?
Bible'a hriak tih hi Thlarau Thianghlim tihna/entirna ani tiin tun hma miten sawi mahse Pu Paul'a thusawi hian a hrilhfiah ani, "A kimlo in kan hriaa a kimlo in kan hril," tiin.
Tun hma mite chuan an hriat kimloh avangin hriak chu Thlarau Thianghlim entirna ani an ti mai ani. Tunlai mite pawn an ti, titu an awm zel bawk ang, mihringte hi luhlul tak kan nia, Bible'a ziak Israel leh Judate chanchin chuan mihringte nihna hrilh hriat kan ni tawh si.
Tunah chuan Pathianin A zawlnei Daniel'a hmanga "hriatna ala pung ang," A tih lawk angin, chu hun a awm kan nih angin Pathian Khawngaihna zarah hriak chu Thlarau Thianghlim entirna anilo tih kan hre thei ta ani, a hnuaia ziak ang huan.
Isaia bung 61: 1 chuan "Lalpa Pathian Thlarau chu ka chungah A awm; achhan chu Lalpa'n inngaitlawm hnenah chanchinṭha hril turin hriak min thih si;" tih ani. A awmzia chu Pathian Thlarau A chunga A awm hma in Pathian hriakthih ani A ti anih chu.
A chung (part 1ah) lamah Olive Kung pahnih, Krista Pahnihten an pek chhuah chu rangkachak hriak, chuchu Pathian Thu ani kan tih tawh kha, chuvangin, "Lalpa'n hriak min thih" tih awmzia chu Lalpa'n A Thlarau (Thlarau Thianghlim) keimahah A dah tihna anilova, "Lalpa'n A rawngbawl turin min ruat, min tir," A (tihna) ti ani chu. "A Thu keimahah A dah ani," A ti ani bawk a.
Chuan Thlarau Thianghlim A chunga awm chu eng atan nge kan tih chuan Amah pui turin ani tih kan hre thei nghal ani, chumi lo chu engdangmah a awmlo.
Saul'ate, Pu David'ate leh a dangdangte pawh rawngbawl tura hriakthih an nih khan Pathianin anmahni awmpuia pui turin A Thlarau Thianghlim A pe ṭhin a, chuchu hrefiah lovin hriak in a entir chu Thlarau Thianghlim emaw kan lo ti ṭhin mai ani, mahse chuchuan hriak in a entir chu Thlarau Thianghlim tihna ani chuang lo. Hriak entir chu Thlarau Thianghlim ani ti turin Bible chang pakhat mah supporttu tur a awmlo.
Tin, Bible chang dang, Lal Isua Pathian thu sawi ngeite kan en chuan Thlarau Thianghlim chu Olive kung pahnih, Krista Pahnihte aṭanga chhuak thei anilo, an thu thua an pek chhuah theih anilo tih kan hria. Entirnan, Johan'a 14: 26ah chuan, "Ṭanpuitu, Thlarau Thianghlim ka hminga Pa in a tirh tur chu.." Johan'a 15: 26 "Ṭanpuitu A lokal hunah, Pa hnen aṭanga ka lo tirh tur--Thutak Thlarau Pa aṭanga chhuak chu.." tiin Thlarau Thianghlim chu Pa aṭanga chhuak, A phalna lova Lal Isua pek theihloh ani tih kan hria.
Tin, A zawlneite hnenah engtinnge Pathianin A Thu a hriattir kan tih chuan A Thlarau, Thlarau Thianghlim hmangin ani.
Chung aṭang chuan hriak chuan a entir chu Thlarau Thianghlim anilo tih kan hre thei ta ani. A hrang veve anni a mahse lak hran theihloh annilo tih a chung thupuitê nei hmasa zawkah khian kan hrilhfiah tawh khi.
Arere thuah Thlarau Thianghlim chu nula thianghlim fing panga ten bura hriak an ken angin bura a spare ken theih anilo, hriak chuan Thlarau Thianghlim a entir miau si lova. Dik tak chuan chu bur chu kan thluak, hriatrengna hi ani. Chuvang chuan Krista pahnihna thute hi thluakah, hriatrengna ah khawl khawma nunpui zel tur ani, tichuan khawnvar chuan I kawng a en zel ang.
f) THLARAU THIANGHLIM HNATHAWH DAN
Thlarau Thianghlim chuan mi ṭhenkhat Pathian ringa A thu apiang pawm tum, duh, inhuamte chu Thutakah A hruai luh nana thilti tura A tih an awm. Entirnan, Pu Abraham'ate, tin, Pu Cornelia hnenah pawh "..Peter'a ko rawh..," A tih kha. (Genesis 12, Tirhkohte Thiltih 10)
Mahse mi tamtak, chhiarsenloh zawkte hnenah erawh chutiangin A ti lo. Achhan chu A awm sa, Pathianin A Thu A zawlneite A hriattir tawh chu ngun takin thinlung hawngin ṭawngṭaina nen chhiar leh zawt zelin an zir, an zawng chhuak tur ani, atheih si a, chuchu Pathian duh leh thawh dan pakhat ani. Mahse, mi tamtak, chhiarsenlohte chuan chutiangin an mahniin an tilova, an zawnglo midang, mihring an ring zawka chuvang chuan mihring doctrinete, zirtirna diklo chuan bumin an awma zirtirna dikloah an awm zui ta zel ani. Chung zinga naupang thinlung ang neite, thinlung inhawngte erawh chauh erawh Pathian Thu, zirtirna dikin A ko chhuak thei ani. I tel ve dawn em?
Chung mihring chhiarsenloh tamtak zingah ṭhenkhat hnenag Thlarau Sual Bum hmang chuan inlarnate hmuh tirin emaw an thluaka hriatthiamna dik niawma zirtirna diklote dahin an bum zawk a, zirtirna diklo hruaitu, mihring doctrinete hrila thehdarhtuah Setan'an a hmang ṭhin ani. Entirnan, khawvel Kristian intite pumkhatloh tirtu - kohhran leh zirtirna diklo hrang hrangte hian a entir ani. Chung khovel kohhrante chu an dikloh zia Bible Thu ṭhenkhat an laa ṭhenkhat an kalha an ngaihdan leh duhdan in an hril zia aṭang a hriat theih. Sakhua dang chu hrilhfiah vak angailo, an diklo tih kan chiang hlawm hle.
Ani, dik tak chuan Pathianin A hnam thlan Israelte inthawina dan leh an mihring doctrinete Lal Isua hmangin A hluihlawna a hnawl ang khan tunlai khawvel kohhran zawng zawngte chu Krista Pahnihna hmangin A hluihlawn lehin an mihring zirtirnate pawh a duhloh zia A hriattir zel dawn ani.
Facebook groupa en duh tan:
Comments
Post a Comment